Аз 3 августи соли ҷорӣ Иёлоти Муттаҳида ба таври доимӣ барои шаҳрвандони чанд кишвар, аз ҷумла Тоҷикистон, барои раводиди сайёҳӣ ва тиҷоратӣ (категорияҳои B-1/B-2) талаби пасандози раводидро оғоз мекунад. Изҳороти дахлдорро Департаменти давлатии ИМА нашр кардааст.
Тибқи қоидаҳои нав, афсарони консулгарии амрикоӣ метавонанд бо салоҳдиди худ аз гирандагони раводид талаб кунанд, то 20 000 доллари амрикоиро ҳамчун кафолати риояи шартҳои будубош дар Иёлоти Муттаҳида ва хуруҷи саривақтӣ аз кишвар талаб кунанд. Дар сурати қонеъ кардани талаботи раводид, пас аз тасдиқи баргаштан аз ИМА маблағҳои гузошташуда баргардонида мешаванд.
Ба феҳристи кишварҳое, ки шаҳрвандони онҳо метавонанд аз ин тасмими нав зарар бинанд, 50 кишвар, аз ҷумла Тоҷикистон, Қирғизистон, Туркманистон ва ҳудуди 30 кишвари африқоӣ ҳастанд.
Пештар барнома дар реҷаи озмоишӣ кор мекард. Он дар моҳи августи соли 2025 ба мӯҳлати як сол ба кор даромад, ки барои пасандози $5,000, $10,000 ё $15,000 пешбинӣ шудааст.
Барои шаҳрвандони Тоҷикистон талаби пардохти гаравпулӣ аз 21 январи соли 2026 эътибор пайдо мекунад. Он вақт Департаменти давлатии ИМА эълон кард, ки ҳаҷми гаравпулӣ ҳангоми суҳбат дар консулгарӣ ба таври инфиродӣ муайян карда мешавад ва пардохти он барои гирифтани раводид кафолат намедиҳад.
Хабар дода шуд, ки дорандагони раводиди B-1/B-2 бояд ба Иёлоти Муттаҳида танҳо тавассути фурудгоҳҳои байналмилалии Бостон, Ню-Йорк ва Вашингтон ворид шаванд. Онҳо бояд пеш аз ба итмом расидани муҳлати будубошашон Иёлоти Муттаҳидаро тарк кунанд.
Вайрон кардани қоидаҳои раводид ё қонунҳои кишвар метавонад боиси аз даст додани пасандоз гардад. Илова бар ин, довталабон ҳуҷҷати I-352 («кафолати муҳоҷират») имзо мекунанд, ки розигии онҳоро барои риояи шартҳои будубош нишон медиҳад.
Ҳафтаи равон The New York Times навишт, ки маъмурони муҳоҷирати ИМА ба боздошти хориҷиён бо раводиди муҳлаташон гузашта, аз ҷумла ҳамсарони шаҳрвандони ИМА дар фурудгоҳҳо шуруъ кардаанд. РБК менависад, чунин санҷишҳо то ҳол ҳадди аққал дар 15 фурудгоҳи ин кишвар гузаронида шудаанд. Вазорати амнияти дохилии ИМА гуфт, ки назорат бар зидди хориҷиёнеро, ки ғайриқонунӣ дар ин кишвар қарор доранд, пурзӯр мекунад.
