20 май дар қароргоҳи президенти Фаронса Эммануэл Макрон дар қасри “Елисей” кофтукоб гузаронида шуд. Дар ин бора рӯзномаи Le Monde хабар медиҳад.
Баъдан, прокуратураи миллии молиявии Фаронса (PNF) далели гузаронидани кофтукобро тасдиқ кард. Тибқи иттилои нашрия, тафтишот дар доираи тафтишоти соли гузашта оғоз шудааст. Он ба қонуншиканиҳои эҳтимолии коррупсионӣ ҳангоми бастани шартномаҳои давлатӣ бо ширкати Shortcut Events дахл дорад. Дар солҳои охир, ин созмон ба омода кардани чорабиниҳои калон барои маъмурияти президент, аз ҷумла маросими интиқоли ҷасади шахсиятҳои барҷастаи Фаронса ба Пантеон машғул буд. Мувофиқи маълумоти ҳафтаномаи ҳаҷвии Le Canard Enchaine, арзиши ҳар як чунин маросим барои давлат тақрибан 2 миллион евроро ташкил медод. Кофтукоби қаблӣ дар қасри президентӣ соли 2018 сурат гирифта буд. Он вақт ёвари Раиси маъмурияти президенти Фаронса Александр Беналл дар ҳамла ба иштирокчиени аввалин чорабинии якуми май айбдор карда мешуд.
