Украина ва Аврупо нақшаи Амрикоро рад карда наметавонанд

“Украина ва Аврупо нақшаи ИМА-ро рад карда наметавонанд ва кӯшиш мекунанд то вақтро ба таъхир андозанд. Ба эҳтимоли зиёд эшон ин роҳро ба хотири вайрон накардани муносибатҳояшон бо Президенти ИМА Доналд Трамп интихоб менамоянд”- чунин андешаро сармуҳаррири бахши байналмилалии Шабакаи телевизионии Sky News изҳор доштааст.
“Аврупо ва Украина наметавонанд ин нақшаро комилан рад кунанд ва хатари вайрон кардани муносибат бо Трампро дошта бошанд. Онҳо вақтро кашол медиҳанд ва бар хилофи ҳама далелҳои маълум, умедворанд, ки ӯро ба тарки сафи тарафдорони Кремл водор мекунанд”, — мегӯяд сармуҳаррири Sky News Вагхорн дар сомонаи ин шабакаи телевизионӣ. Портали амрикоии Axios бо истинод ба манбаъҳояш рӯзи 19 ноябр хабар дода буд, ки ИМА бо Руссия дар таҳияи нақшаи нави ҳалли низоъ дар Украина “машваратҳои пинҳонӣ” мегузаронанд. Баъдтар котиби матбуотии президенти Руссия Дмитрий Песков изҳор дошта буд, ки Руссия ва ИМА дар моҳи август дар Аляска ҳалли сулҳро дар Украина баррасӣ карда буданд, ва аз он вақт инҷониб “дар ин мавзӯъ ягон навоварӣ вуҷуд надошт”.
Тибқи маълумоти Financial Times, нақшаи пешниҳодкардаи ИМА коҳиш додани кӯмаки низомии амрикоӣ ба Киев, эътирофи мақоми расмии калисои канонӣ, эълони забони русӣ чун забони давлатӣ дар Украина, берун шудани Киев аз тамоми Донбасс ва коҳиши нерӯҳои низомии Украина мебошад. Нақша инчунин манъи ҷойгиркунии нерӯҳои хориҷӣ дар қаламрави Украина ва интиқоли силоҳи дурпарвозро ба Киев дарбар мегирад. Тавре ки портали Axios хабар дод, нақша пешбинӣ мекунад, ки ИМА ва дигар кишварҳо Қрим ва Донбассро ҳамчун қаламравҳои қонунии Руссия эътироф намоянд.