Reuters: Трамп ба Мадуро як ҳафта вақт дод

“Доналд Трамп ҳангоми сӯҳбат бо Президенти Венесуэла Николас Мадуро ба ӯ як ҳафта вақт дод, то кишварро тарк кунад, аммо ӯ рад кард” – менависад Reuters бо истинод ба чаҳор манбаъ.
Дар занге, ки 21 ноябр баргузор шуд, Трамп ба Мадуро гуфт, ки ӯ метавонад бо аъзои оилааш ба ҳар ҷои интихобкардааш равад. Мӯҳлати Президенти ИМА барои ин рӯзи ҷумъа, 28 ноябр ба охир расид ва пас аз он Трамп дар шабакаҳои иҷтимоии худ дар бораи баста шудани фазои ҳавоии Венесуэла навишт.
Мадуро, ба гуфтаи манбаъҳои Reuters, ба Трамп гуфт, ки омода аст Венесуэларо тарк кунад, аммо ба шарте ки ӯ ва аъзои оилааш афви пурраи ҳуқуқӣ, аз ҷумла лағви ҳама таҳримҳои ИМА ва қатъи парванда алайҳи ӯ дар додгоҳи Байналмилалии ҷиноиро ба даст оранд. Тибқи иттилои Reuters, сӯҳбат камтар аз 15 дақиқа тӯл кашид ва дар давоми он Трамп як қатор дархостҳои Президенти Венесуэларо “рад кард”. Аз ҷумла, Мадуро хоҳиш кард, ки таҳримҳо аз беш аз 100 мансабдори Венесуэла, ки бисёре аз онҳо дар нақзи ҳуқуқи инсон, тиҷорати маводи мухаддир ё фасод айбдор мешаванд, бардошта шаванд. Ба гуфтаи ду манбаъ, Президенти Венесуэла инчунин хоҳиш кардааст, ки ҳукумати гузаришро ноиби Президент Делси Родригес роҳбарӣ кунад.
Трамп тасдиқ кард, ки бо Мадуро сӯҳбат кардааст, аммо тафсилот надод. Ба гуфтаи се манбаи Reuters, маъмурияти Мадуро боз як сӯҳбати телефонӣ бо Президенти ИМА дархост кардааст. Яке аз аввалинҳо шуда дар бораи сӯҳбати тилфонии Трамп ва Мадуро рӯзномаи The New York Times навишт. Ба қавли нашрия, Мадуро дар ин сӯҳбат гуфтааст, ки омода аст дар давоми ду-се сол истеъфо диҳад, аммо Вашингтон ин нақшаро рад кард. Баъдтар The Wall Street Journal илова кард, ки Трамп Мадуроро таҳдид кард, ки имконоти дигарро, аз ҷумла истифодаи қувваро, агар ӯ ихтиёран тарк накунад, баррасӣ мекунад.
Муносибатҳои ИМА ва Венесуэла дар давраи дуюми президентии Трамп ба таври назаррас бад шуданд. Маъмурияти ӯ Мадуроро президенти қонунӣ эътироф намекунад ва ҳукумати кишварро дар муборизаи нокифоя бо қочоқи маводи мухаддир айбдор мекунад. ИМА ҳавопаймои муосири худ “Джералд Форд”, киштиҳои нобудкунанда ва ҳавопаймоҳои ҷангиро ба ҳавзаи Кариб фиристод ва аз моҳи сентябр ба киштиҳое, ки гӯие маводи мухаддир интиқол медоданд, беш аз 20 зарба зад. Дар натиҷаи ин зарбаҳо беш аз 80 нафар кушта шуданд. Reuters навиштааст, ки дар сурати ҳамлаи ИМА, Венесуэла ду сенарияи посух дорад-муқовимати партизанӣ ё табдил ба “давлати идоранашаванда”.