Зеленский Путинро ба Киев даъват кард

Президенти Украина Владимир Зеленский изҳор дошт, ки қасди мулоқот бо президенти Русия Владимир Путин дар Маскавро надорад. Ба ҷои ин, ӯ ошкоро раҳбари Русияро ба Киев даъват кард.
“Ман албатта метавонам ӯро ба Киев даъват кунам; бигзор биёяд. Ман ӯро расман даъват мекунам. Аммо агар касе намехоҳад мулоқот кунаду бо ягон сабаб инро мустақиман гуфта натавонад, баъд чунин даъватҳо ба Маскав шудан мегиранд”, – гуфт Зеленский.
Ин изҳорот аз даъвати Владимир Путин, ки моҳи сентябри соли гузашта ҳангоми сафараш ба Чин садо дода буд, сарчашма мегирад. Дар он вақт, президенти Русия омодагии худро барои мулоқот бо Зеленский дар Маскав эълон кард ва шарҳ дод, ки президенти ИМА Доналд Трамп ин дархостро пешниҳод кардааст.
“Агар Зеленский омода бошад, ки ба Маскав биёяд, чунин мулоқот баргузор мешавад”, – гуфт Путин.
Дар посух, Зеленский қайд кард, ки даъват ба Маскав метавонад нишонаи норозигии Кремл аз баргузории музокирот бошад, аммо таъкид кард, ки худи далели баррасии мулоқоти имконпазирро мусбат мешуморад.
Кремл қаблан изҳор дошт, ки Владимир Путин имкони гуфтушунид бо президенти Украинаро пазируфтаст, аммо бовар дорад, ки чунин мулоқот бояд “хуб омода” шуда бошад ва танҳо пас аз баррасии масъалаҳои калидӣ дар сатҳи коршиносон бояд баргузор шавад.