Туркманистон: Пули 200 манат ба муомилот баромад

Аз якуми декабр Бонки Марказии Туркманистон банкноти номиналӣ 200 манатро ба муомилот баровард.
Ба кор даровардани банкноти нав ба 30-солагии гирифтани Мақоми бетарафии доимӣ аз ҷониби Туркманистон рост омад. Пул аз маводи полимерӣ сохта шудааст. Дар тарафи пеши он монументи Arkadag тасвир шудааст, дар тарафи қафо бинои маъмурии шаҳри Аркадаг.
Ҳамзамон, банкноти полимерии тағирефта бо номиналҳои 1, 5, 10 манат ба муомилот дароварда шуданд. Ранг ва тарҳи ин пулҳо дар маҷмӯъ ҳифз шудааст, аммо рамзи соли байналмилалии сулҳ ва эътимод, ки соли 2025 аз ҷониби мақомоти Туркманистон эълон шудааст, илова карда шудааст.
Бонк шарҳ дод, ки хусусиятҳои калидии пулҳои нав муҳофизати баланд аз қалбакӣ ва муқовимат ба таъсири беруна -ифлосшавӣ мебошанд. Ҳамаи банкноти намунаи солҳои 2009, 2012, 2014, 2017 ва 2020 дар ҳудуди Туркманистон ҳамчун воситаи қонунии пардохт боқӣ мемонанд.
Қурби расмии манати Туркманистон солҳои зиёд дар сатҳи 3,5 барои як доллар нигоҳ дошта мешавад. Қурби “бозори сиёҳ” ё қурби воқеӣ 19-20 манат барои як доллар аст.