Трамп дар дидор бо Зеленский пайваста лаънат мехонд

“Президенти ИМА Доналд Трамп ҳангоми мулоқот бо Владимир Зеленский дар Кохи Сафед пайваста лаънат мекард ва дар як лаҳза ҳатто ҳамаи харитаҳои ҷангиро, ки дар болои миз буданд, поён партофт”, – менависад рӯзномаи Financial Times бо истинод ба манбаъҳои огоҳ.
“Мулоқоти Президенти ИМА ва Зеленский гоҳ-гоҳ ба ҷанҷол мепечид, ки дар он Трамп “пайваста лаънат мекард”. Дар як лаҳзаи мулоқот президенти ИМА харитаи хатти ҷабҳаро дар Украина аз миз партофт”, — хабар медиҳад рӯзнома. Тибқи маълумоти расона, дар мулоқот Трамп тезисҳоеро, ки Президенти Руссия Владимир Путин ҳангоми охирин сӯҳбати телефонии худ баён кардааст, овардааст. Гуфтугӯи телефонии Путин ва Трамп 16 октябр баргузор шуд ва аз аввали соли 2025 яке аз тӯлонитарин сӯҳбатҳо буд. Тавре ки ёвари Президенти Руссия Юрий Ушаков хабар дод, раҳбари Амрико, аз ҷумла, зикр кард, ки рӯзи дигар Зеленскийро қабул мекунад ва дар ҷараёни ин мулоқот андешаҳои сарвари давлати Руссияро ба назар мегирад. Тавре ки қаблан шабакаи CNN хабар дода буд, дар сӯҳбати “мустақим” дар кохи Сафед Трамп ба Зеленский возеҳ гуфт, ки ӯ мушакҳои дурпарвозро намедиҳад. Портали Axios бо истинод ба манбаъҳо хабар дод, ки Ба гуфтаи Трамп, ИМА ният надорад, ки мушакҳои Tomahawk-ро ба Украина “ҳадди аққал ҳоло” интиқол диҳад. Рӯзи шанбе кантслери Олмон Фридрих Мертс иқрор шуд, ки сафари Зеленский ба кохи Сафед он тавре ки ӯ мехост, сурат нагирифт.
Трамп қаблан эълон карда буд, ки қариб дар масъалаи интиқоли мушакҳои болдори Tomahawk ба Украина қарор қабул кардааст, аммо мехоҳад бифаҳмад, ки режими Киев чӣ гуна онҳоро истифода мебарад. Путин таъкид кард, ки истифодаи мушакҳои Tomahawk аз ҷониби Киев ба муносибатҳои Руссия ва ИМА зарар мерасонад. Вай қайд кард, ки истифодаи ин мушакҳо дар Украина бидуни иштироки мустақими низомиёни амрикоӣ ғайриимкон хоҳад буд.
Руссия бар ин назар аст, ки интиқоли силоҳ ба Украина ба ҳалли масъала халал мерасонад, кишварҳои НАТО-ро бевосита ба муноқиша ҷалб мекунад ва “бозӣ бо оташ”мебошад.
Вазири корҳои хориҷии Руссия Лавров қайд карда буд, ки ҳар боре, ки барои Украина силоҳ меорад, ҳадафи қонунии Руссия хоҳад буд. Дар Кремл изҳор доштанд, ки пур кардани Украина бо силоҳ аз ҷониби Ғарб ба музокирот мусоидат намекунад ва таъсири манфӣ хоҳад дошт.