Reuters: ИМА бовар дорад, ки танҳо сеяки мушакҳои Эронро нобуд кардааст

“Иёлоти Муттаҳида метавонад бо итминон гӯяд, ки танҳо тақрибан сеяки тамоми мушакҳои Эронро нобуд кардааст” – хабар медиҳад Reuters рӯзи 27 март бо истинод ба суханони панҷ манбаи беном, ки бо маълумоти иктишофии ИМА ошно ҳастанд.
Тақрибан сеяки мушакҳои дигар, ба гуфтаи ҳамсӯҳбатони оҷонсӣ, осеб дидаанд, нобуд шудаанд ё дар зери харобаҳои нақбҳо ва бункерҳои зеризаминӣ қарор доранд.
Яке аз манбаъҳо гуфт, ки хадамоти иктишофӣ маълумоти шабеҳро дар бораи ҳавопаймоҳои бесарнишин гирифтааст. Бо итминон метавон гуфт, ки тақрибан сеяки ҳамаи ҳавопаймоҳои бесарнишини Эрон нобуд карда шудаанд. Маълумоти иктишофӣ нишон медиҳад, ки Теҳрон ҳанӯз ҳам захираи зиёди мушакҳо дорад ва шояд пас аз анҷоми амалиёти ҷангӣ баъзе мушакҳоеро, ки ҳоло осеб дидаанд ё дастрас нестанд, барқарор кунад.
Пентагон гуфт, ки аз оғози ҷанг Эрон 90% зарбаҳои мушакӣ ва дронҳоро коҳиш додааст. Фармондеҳии марказии Нерӯҳои мусаллаҳи ИМА изҳор дошт, ки 66% иқтидори истеҳсолии Эрон барои истеҳсоли мушакҳо ва дронҳо осеб дидааст ё нобуд шудааст. Дар фармондеҳӣ мушаххас карда нашудааст, ки чӣ қадар мушакҳо ва дронҳои Эрон дар ҷанг нобуд карда шудаанд.
Яке аз ҳамсӯҳбатони Reuters гуфтааст, ки муайян кардани он, ки Эрон пеш аз оғози ҷанг чанд мушак дошт, душвор аст. ИМА чунин маълумотро ошкор накардааст. Низомиёни Исроил бар ин назаранд, ки пеш аз ҷанг Эрон 2500 мушаки баллистикӣ дошт, ки қодир ба расидан ба қаламрави Исроил буд. Як мансабдори баландпояи низомии Исроил изҳор доштааст, ки дар ҷараёни ҷанг беш аз 335 мушак, яъне тақрибан 70% иқтидори мушакии Эрон “безарар” карда шудааст. Мақомоти Исроил бар ин назаранд, ки нобуд кардани 30% мушакҳои боқимондаи Эрон душвор хоҳад буд.
Кохи сафед ба дархости Reuters ба ин савол посух надод. Мақомоти ИМА дар оғози ҷанг изҳор доштанд, ки мехоҳанд нерӯҳои мусаллаҳи Эронро бо нобуд кардани нерӯҳои баҳрӣ, мушакҳо ва ҳавопаймоҳои бесарнишини он заиф кунанд ва инчунин ба Теҳрон имкон надиҳанд, ки силоҳи ҳастаӣ ба даст орад.
Президенти ИМА Доналд Трамп борҳо изҳор доштааст, ки Эрон амалан мушакҳо ва ҳавопаймоҳои бесарнишин надорад. Бори охир ӯ дар ин бора рӯзи 26 март гуфта буд, ки Эрон “мушакҳои хеле кам дорад”.