24 октябр дар деҳаи Пушинги ноҳияи Данғара Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон мавзеи нави саноатиро бо 3 коргоҳи истеҳсолӣ ба истифода доданд.
Технологияи воридшуда имкон медиҳад, ки дар ин корхонаҳо маводи ғизоӣ, намудҳои гуногуни либос ва қубурҳои пластикӣ истеҳсол карда шавад.
Дар ин мавзеи нави саноатӣ зиёда аз 100 ҷойи нави корӣ таъсис ёфт ва сокинони маҳаллӣ баъди омӯзишу такмили маҳорати касбӣ ба кор таъмин шудаанд.
Иқтидори технологии коргоҳи истеҳсоли макарон имкон медиҳад, ки мувофиқ ба дархости мизоҷон то 14 номгӯи маҳсулот тавлид ва ба бозор пешниҳод карда шавад.
Дар ин иншооти нави саноатӣ 10 нафар бо кори доимӣ таъмин шуданд ва ҳадаф истеҳсоли маҳсулоти рақобатпазир аст.
Дар коргоҳи қубурҳои пластикӣ истеҳсоли маҳсулот мувофиқ ба талаботи бозор ба роҳ монда шудааст. Иншооти нави саноатӣ дар як шабонарӯз барои истеҳсоли то 3 ҳазор метр қубурҳои пластикӣ иқтидор дорад. Дар маҷмуъ қубурҳои пластикӣ бо 4 андоза тавлид мешавад.
Бонувон дар корхонаи дӯзандагӣ баъди омӯзиш ва такмили ихтисос ба фаъолият оғоз намудаанд. Технологияи муосире, ки насб карда шудааст, имкон медиҳад, ки бонувон мувофиқ ба дархости мизоҷон намудҳои гуногуни либосҳои низомӣ, корӣ ва варзиширо омода намоянд.
Дар маҷмуъ дар коргоҳи дӯзандагӣ 85 зану духтари деҳа ба шуғли доимӣ таъмин шудаанд.
Зимни муарифии маҳсулоти корхонаҳои санотӣ маълумот дода шуд, ки ҳоло дар деҳаи Пушинги ноҳияи Данғара номгӯи зиёди маводи ғизоӣ, масолеҳи сохтмонӣ ва либос истеҳсол карда мешавад.
Дар иншооте, ки 24 октябр дар деҳаи Пушинги ноҳияи Данғара бо иштироки Пешвои миллат муҳтарам Эмомалӣ Раҳмон мавриди истифода қарор гирифт, зиёда аз 230 ҷойи нави корӣ таъсис ёфт.
Пушинг: Мавзеи нави саноатӣ бо 3 коргоҳи истеҳсолӣ ифтитоҳ шуд
Блоки рекламавӣ
