Панҷакент: Ба овозаҳо бовар накунед!

Дар мақомоти иҷроияи маҳаллии ҳокимияти давлатии шаҳри Панҷакент бо соҳибкороне, ки ба асари сӯхтор дар бозори “Гулистон” санаи 12 ноябри соли равон зиёни молӣ дидаанд, мулоқот баргузор шуд.
Дар ҷамъомад раиси шаҳр Абдухолиқ Холиқзода, прокурори шаҳр, мушовири адлияи дараҷаи 1 Искандар Раҳматзода, сардори шуъбаи шаҳрии Кумитаи давлатии амнияти миллӣ Саидҷон Акобиров, сардори шуъбаи ВКД дар шаҳри Панҷакент Шоҳвалӣ Ташрифзода иштирок доштанд.
Тибқи гузориши сардори хадамоти оташнишонии шаҳр сӯхтор ба асари расиши кӯтоҳи ноқилҳои барқӣ сар задааст. Дар гузориши сардори нозироти андози шаҳр, намояндагони бонкҳо, аз ҷумла иттилоъ дода шуд, ки тибқи талаботи қонунгузорӣ ба соҳибкорони бозори мазкур, ки дар нозироти андоз ба қайд гирифта шудаанд, дар пардохти андозҳо таваққуф эълон шуда, пардохти маблағи қарзҳои бонкии онҳо 12 моҳ ва суди он 6 моҳ боздошта мешавад.
Зимни иттилои прокурори шаҳр гуфта шуд, ки ҳоло тафтишот ҷиҳати муайян намудани сабабу омилҳои сар задани ин ҳодисаи нохуш аз ҷониби прокуратураи шаҳр идома дошта, баъди анҷоми он дар ин бора хулосаи қонунӣ бароварда мешавад.
Дар посух ба саволҳои иштирокчиён дар фарҷоми ҷамъомад дар суханронии раиси шаҳр Абдухолиқ Холиқзода таъкид шуд,ки мақомоти иҷроияи маҳаллии ҳокимияти давлатии шаҳр ҷиҳати муҳайё намудани шароити идомаи фаъолият ба соҳибкорон, расонидани кӯмак ба онҳо тадбирҳои амалӣ меандешад.
Аз ҷумла, ҳоло дар ҳудуди собиқ корхонаи консервбарории “Шарбат” бо ҷалби ширкати ватанӣ бунёди бозори дорои беш аз 400 ҷойи савдо бо шароити мусоиди фаъолият идома дошта, ба сохтмони он зиёда аз 140 нафар бинокорон ҷалб карда шудаанд ва он моҳи декабри соли равон мавриди истифода қарор мегирад.
Ҳамчунин бо қарори раиси шаҳр ҷиҳати расонидани кӯмаки яквақта ба зиёндидагони сӯхтор 300 ҳазор сомонӣ аз буҷети шаҳр ҷудо шуда, ҳоло масъалаи ифтитоҳи суратҳисоб бо рамзи ягона барои саҳмгузории хоҳишмандони кӯмакрасонӣ дар ҳудуди кишвар ва хориҷ аз он дар арафаи ҳал шудан аст.
Роҳбарияти ҷамъияти матлуботи шаҳр вазифадор карда шудааст, ки дар ҳамкорӣ бо Иттифоқи матлутоти Ҷумҳурӣ барои расонидани кӯмак ба зиёндидадагони сӯхтор ва бартарф намудани оқибатҳои он чораҳои амалӣ андешад.
Аз иштирокчиёни ҷамъомад дархост карда шуд, ки ба ҳар гуна овозаҳои беасос дар мавриди сабабу омилҳои ин ҳодисаи нохуш ва дигар масъалаҳои вобаста ба он, ки аз ҷониби нафарони ҳангоматалаб паҳн карда мешаванд, дода нашаванд.