Паёми табрикии Раҷаб Аҳмадзода

Фарорасии Рӯзи матбуотро ба кулли кормандони воситаҳои ахбори омма, собиқадорони соҳа ва аҳли қалами вилоят табрик гуфта, ба онҳо саломатӣ ва дар иҷрои рисолати касбӣ барору муваффақиятҳо орзу менамоям.
Матбуот ва дигар воситаҳои ахбори омма дар ҷомеаи муосир мақому манзалати хоса дошта, ҳамчун яке аз ниҳодҳои муҳими иҷтимоӣ дар ташаккули фазои иттилоотии солим ва таҳкими ваҳдат нақши бориз доранд.
Дар замони имрӯз, ки иттилоот бо суръати бесобиқа паҳн мегардад, нақши воситаҳои ахбори омма дар таъмини амнияту субот мақоми хоса касб менамояд. Тавре Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон таъкид намудаанд: “Манфиатҳои миллӣ ва суботу оромии ҷомеа тақозо менамоянд, ки воситаҳои ахбори оммаи ватанӣ на танҳо дастгоҳи тавонои хабарӣ бошанд, балки дар муборизаи иттилоотӣ барои ҳифзи манфиатҳои миллӣ, алалхусус амнияти давлат ва ҷомеа хизмат кунанд”.
Боиси таъкид аст, ки матбуот ҳамчун оинаи ҳаёт равандҳои сиёсӣ, иқтисодӣ ва фарҳангиро бо воқеъбинӣ ва масъулият инъикос менамояд. Маҳз тавассути фаъолияти касбӣ ва таҳлилгаронаи журналистон аҳли ҷомеа аз моҳияти ислоҳот, ҳадафҳои стратегии давлат ва самтҳои асосии рушди кишвар бохабар мегардад. Аз ин лиҳоз, матбуот на танҳо воситаи иттилоърасонӣ, балки василаи муҳими ташаккули шуури сиёсӣ ва маърифати шаҳрвандӣ мебошад.
Дар даврони соҳибистиқлолӣ нақши матбуот дар таҳкими пояҳои давлатдорӣ ва инъикоси дастовардҳои миллӣ ба таври назаррас афзудааст. Раванди бунёди давлатдории навин, таҳкими ваҳдати миллӣ, рушди иқтисод ва пешрафти соҳаҳои иҷтимоӣ тавассути матбуот ба таври густурда ба ҷомеа муаррифӣ гардида, ба таҳкими худшиносиву худогоҳии миллӣ мусоидат намудааст. Инъикоси воқеъбинонаи корҳои ободониву созандагӣ, татбиқи лоиҳаҳои бузург ва ислоҳоти иқтисодиву иҷтимоӣ дар таҳкими эҳсоси ифтихор аз Ватан ва эътимод ба фардои кишвар нақши муассир дорад.
Дар баробари ин, журналистикаи муосир бояд ба принсипҳои касбият, воқеънигорӣ ва риояи меъёрҳои ахлоқӣ такя намояд. Дар шароити рақобати иттилоотӣ ва паҳншавии иттилооти носаҳеҳ, масъулияти журналистон барои ҳифзи фазои солими иттилоотӣ дучанд мегардад. Танҳо бо такя ба таҳлили амиқ, санҷиши дақиқи манбаъҳо ва мавқеи мустақили касбӣ матбуот метавонад эътимоди ҷомеаро ҳифз намояд.
Боварии комил дорам, ки кормандони воситаҳои ахбори оммаи вилоят дар соли таърихии омодагиҳо ба таҷлили 35-солагии Истиқлоли давлатии Ҷумҳурии Тоҷикистон дар пешрафти соҳаҳои мухталифи иқтисодиву иҷтимоии кишвари азизамон саҳми арзанда мегузоранд.
Бори дигар, кормандони матбуот ва дигар воситаҳои ахбори оммаи вилоятро бахшида ба Рӯзи матбуот табрик намуда, ба онҳо саломатии бардавом ва хушиҳои рӯзгорро таманно мекунам.
Ид муборак, аҳли қалами вилоят!