Ноҳияи Спитамен соҳиби автомашинаи BYD гардид

Дар назди Театри давлатии мазҳакаи мусиқии ба номи Камоли Хуҷандӣ маросими ҷамъбасти бистрӯзаи сеюми маъракаи пахтачинӣ доир шуд.
Дар ҷамъомад, ки бо ҳузури роҳбарияти вилоят, масъулони соҳа ва пахтакорони пешсаф доир шуд, натиҷаҳои меҳнати заҳматкашон дар бистрӯзаи сеюми маъракаи пахтачинӣ ҷамъбаст ва ғолибони мусобиқаи меҳнатӣ муайян гардиданд.
Ноҳияи Спитамен сазовори ҷойи аввал, ноҳияи Ашт соҳибии ҷойи дуюм гардид ва дар байни ҷамоатҳо Ҷамоати деҳоти Хуррамзамини ноҳияи Спитамен ғолиби мусобиқаи меҳнатӣ дониста шуд.
Раиси вилояти Суғд Раҷаб Аҳмадзода, зимни супоридани вимпел ва мукофотҳои пулӣ ба ғолибон аз заҳмати шабонарӯзии пахтакорон ва саҳми онҳо дар таъмини амнияти озуқавории кишвар ёдовар шуд. Таъкид гардид, ки бо истифодаи самараноки захираҳо ва иқтидорҳои мавҷуда лозим аст пахта сари вақт ва бе талаф ҷамъоварӣ ва нақшаи пешбинишуда иҷро карда шавад.
Ҳамзамон, ба як қатор хоҷагиҳои намунавӣ ва чинакчиёни беҳтарин туҳфаҳои хотиравӣ тақдим гардид
Тибқи иттилои Сарраёсати кишоварзии вилояти Суғд нақшаи истеҳсоли пахта дар ноҳияи Спитамен 14 ҳазору 291 тонна муқаррар шуда, то имрӯз 14 ҳазору 305 тонна пахта ҷамъоварӣ гардидааст, ки ба 100 фоизи нақша баробар мебошад. Барои иҷрои нақшаи истеҳсоли пахта ба ноҳияи Спитамен автомашинаи BYD туҳфа карда шуд.