Нархи тилло аз 5000 доллар гузашт

“Нархи тилло дар биржаҳои ҷаҳонӣ рӯзи 26 январ бори аввал дар таърих дар пасманзари ташаннуҷи афзояндаи геополитикӣ аз 5000 доллар барои як унсия боло рафт”, – менависад Reuters. Металли қиматбаҳо дар биржаҳои ҷаҳонӣ субҳи рӯзи душанбе бо нархи 5029 доллар барои як унсия савдо мешуд. Коршиносон, қайд мекунад оҷонсӣ, пешгӯӣ мекунанд, ки нархи тилло, ки сармоягузорон ба таври анъанавӣ дар давраи ноустуворӣ ба он муроҷиат мекунанд, афзоиш хоҳад ёфт. Дар байни сабабҳои асосӣ, таҳлилгарон афзоиши ихтилофоти байни Иёлоти Муттаҳида ва НАТО дар бораи Гренландия ва ҷанги давомдори Русия бо Украинаро қайд мекунанд.
Ба талабот ба тилло, менависад Reuters, таҳдиди ИМА барои ҷорӣ кардани 100% тариф барои воридот аз Канада, агар ин кишвар бо Чин созишномаи тиҷоратӣ имзо кунад, таъсир расонид. Дар соли 2025, ба ёд меорад Reuters, нархи тилло дар пасманзари сабук кардани сиёсати пулию қарзии ИМА, талабот аз бонки марказии Чин ва таваҷҷӯҳи баланди сармоягузорон ба металлҳои қиматбаҳо 64% боло рафт.
Bloomberg моҳи январ ҳисоб кард, ки аз оғози ҷанги Русия ва Украина дар соли 2022 арзиши захираҳои тиллои Бонки марказии Русия беш аз 216 миллиард афзоиш ефтааст. Ба ҳисоби агентӣ, тақрибан 43% захираҳои Бонки Русия ба тилло рост меояд, дар ҳоле ки то оғози ҷанги бузург бо Украина ҳиссаи он ба 21% мерасид.
Русия яке аз бузургтарин истеҳсолкунандагони тилло дар ҷаҳон аст. Аммо дастрасии металлҳои қиматбаҳо аз Русия ба бозорҳои байналмилалӣ бо сабаби таҳримҳои пас аз оғози ҷанг ҷорӣшуда, маҳдуд аст.