Хатлон: Раиси вилоят дар ноҳияи Ҷайҳун

Раиси вилояти Хатлон Давлаталӣ Саид ба ноҳияи Ҷайҳун сафари корӣ анҷом дода, аз рафти таъмири роҳҳои маҳаллӣ, ба истифода додани бинои иловагӣ муассисаи таълимӣ, вазъи хизматрасонӣ дар соҳаи тандурустӣ, ҷамъоварии ҳосили кишоварзӣ ва қабули шаҳрвандон иштирок кард.
Дар ноҳияи Ҷайҳун бо штироки раиси вилояти Хатлон Давлаталӣ Саид бо назардошти талабот ва боз ҳам беҳтар кардани шароити таълиму тарбияи насли наврас дар назди муассисаи таҳсилоти миёнаи умумии рақами 22-и ноҳияи Ҷайҳун бинои иловагии таълимӣ мавриди баҳрабардорӣ қарор дода шуд.
Иншооти соҳаи маориф бо дастгирии МИҲД-и ноҳия ва бо саҳми сокинону соҳибкорон ба истиқболи ҷашни 35-солагии Истиқлоли давлатӣ бунёд гардида, аз 6 синфхонаи таълимӣ иборат аст ва барои ба таҳсил фаро гирифтани 300 хонанда дар ду баст пешбинӣ шудааст.
Дар идомаи сафари корӣ раиси вилояти Хатлон Давлаталӣ Саид 1,7 километр роҳи аҳамияти маҳалидоштаи деҳаи Лоҳутии ҷамоати деҳоти Истиқлоли ноҳияи Ҷайҳунро низ мавриди истифода қарор дод.
Тибқи иттилоъи масъулини соҳа соли равон дар ноҳияи Ҷайҳун 14 километр роҳи мошингард бо мусоидати масъулини МИҲД ва Идораи давлатии нигоҳдории роҳҳои автомобилгарди ноҳия аз ҷониби соҳибкорону шахсони саховатманд пурра ва хушсифат таъмиру мумфарш ва даҳҳо километри дигар сангфар гардида, барои гузаронидани таъмири асосӣ омода карда шудааст, ки маҷмуан маблағи он 7 миллиону 506 ҳазор сомониро ташкил медиҳад.
Дар ин сафари корӣ раиси вилояти Хатлон Давлаталӣ Саид аз шароити кунунии шуъбаҳои Беморхонаи марказии ноҳияи Ҷайҳун дидан намуда, ҷиҳати ҳарчӣ зудтар бартараф намудани мушкилоти ҷойдоштаи беморхона ба масъулини соҳа дастуру супоришҳои мушаххас дод.
Раиси вилоят зимни суҳбат ба кормандони беморхона ҷиҳати бештар такмил додани сатҳи тахассуси онҳо, баланд бардоштани сифати хизматрасонии тиббӣ ба аҳолӣ ва муоширати хубу масъулияти баланд доштан дар кору фаъолият тавсияҳои судманд дод.
Дар идомаи сафари корӣ ба ноҳияи Ҷайҳун раиси вилояти Хатлон Давлаталӣ Саид аз хоҷагии деҳқонии “Сомона”, воқеъ дар ҷамоати деҳоти Панҷ дидан намуда, ба нашъунамо ва ҷоамъоварии ҳосили сабзӣ шинос шуд.
Иттилоъ дода шуд, ки ин мавсим аҳли заҳмати хоҷагии мазкур дар масоҳати умумии 15 гектар сабзӣ кишт намудаанд ва дар натиҷаи коркарди дурусти агротехникӣ ва ғизодиҳии саривақтӣ тавонистанд ба натиҷаҳои назарраси меҳнатӣ ноил гарданд.
Гуфта шуд, ки бо мусоид омадани боду ҳавои имсола ва дар ҳамкорӣ бо олимону мутахассисон ҳосилнокӣ аз ҳар гектар дар хоҷагии деҳқонии “Сомона” аз 400 то 500 тоннаро ташкил дода истодааст.
Дар зиминаи дастуру ҳидоятҳои раиятпарваронаи Пешвои миллат муҳтарам Эмомалӣ Раҳмон бо мақсади ҳаллу фасл намудани мушкилот ва масъалаҳои ҳалталаби ҷомеа дар бинои мақомоти иҷроияи ҳокимияти давлатии ноҳияи Ҷайҳун аз ҷониби раиси вилояти Хатлон Давлаталӣ Саид қабули шаҳрвандон доир гардид, ки дар он сокинони маҳал иштирок намуданд.