Дар кишвари Гвинея-Бисауи Африқои Ғарбӣ табаддулоти низомӣ рух дод. Ба гуфтаи як гурӯҳи низомӣ, ҳамаи мақомоти давлатӣ, инчунин марзҳои баҳрӣ, ҳавоӣ ва заминии ин кишвар муваққатан баста шудаанд.
Низомиён иддао карданд, пас аз он ки фармондеҳии олии нерӯҳои мусаллаҳ гӯё нақшаи тақаллуб дар интихобот ва ноором кардани вазъияти кишварро ошкор кард, бар зидди ҳукумат шӯриш бардоштанд. Онҳо иддао карданд, ки дар ин нақша сиёсатмадорон ва “нашъаҷаллобон” даст доранд.
Ба гуфтаи хабаргузории dpa, дар пойтахт, Бисау, садои тирпарронӣ шунида шудааст. Дар ҳамин ҳол, маҷаллаи Jeune Afrique хабар дод, ки президент Умару Сисоку Эмбало, ҳамроҳ бо вазири корҳои дохилӣ ва сардори ситоди генералӣ, дар қасри президентӣ боздошт шудаанд. Гуфта мешавад, ки ҳеҷ яке аз онҳо маҷруҳ нашудаанд.
Интихоботи президентӣ ва парлумонӣ дар Гвинея-Бисау 23 ноябр баргузор шуданд. Эмбало ва рақиби асосии ӯ Фернандо Диас де Коста ҳарду аз пирӯзии худ хабар доданд, ҳарчанд натиҷаҳои расмӣ бояд 27 ноябр эълон шавад. Гуфта мешавад, ки овоздиҳӣ оромона гузашт.
Умару Сисоку Эмбало аз соли 2020 инҷониб дар сари қудрат аст; мӯҳлати президентии ӯ чанд моҳ пеш ба охир расид. Ӯ парлумонро дар охири соли 2023 пароканда кард. Мухолифон ӯро ба фишор овардан ба мухолифони сиёсӣ, рӯзноманигорон ва ҳомиёни ҳуқуқи башар айбдор карданд.
