Дар Афғонистон дастрасӣ ба интернет ва алоқаи мобилӣ барқарор карда шуд

Дастрасӣ ба интернет dа шабакаҳои телекоммуникатсионӣ дар Афғонистон пас аз қатъи пурра, ки қариб 72 соат давом кард, барқарор карда шуд. Дар ин бора Khaama бо истинод ба манбаъҳо дар минтақаҳои гуногуни кишвар хабар дод.
Рӯзи якуми октябр хадамоти байналмилалии мониторинги Веб NetBlocks эълон кард, ки дастрасӣ қисман барқарор карда мешавад.
Тавре ки “Интерфакс” бо истинод ба Associated Press хабар медиҳад, Толибон (ҳаракати мамнуъ дар Тоҷикистон) гузоришҳоро дар бораи қасдан хомӯш кардани интернет рад карданд ва мушкилотро бо корҳои таъмирӣ барои иваз кардани кабелҳои нахӣ-оптикии номувофиқ вобаста карданд. Аммо ин хабар аллакай аз вебсайти Associated Press тоза карда шудааст.Намояндаи расмии ҳаракати “Толибон” (мамнуъ дар Тоҷикистон) Забеҳулло Муҷоҳид, ки хабаргузории амрикоӣ ба он ишора кардааст, изҳор дошт, ки ин масъаларо шарҳ надодааст ва хабари пахшкардаи Associated Press-ро дурӯғ номид.
Тибқи маълумоти Afghanistan International, дастрасӣ ба интернет бо фармони иҷрокунандаи вазифаи сарвазири Афғонистон мулло Ҳасани Охунд барқарор карда шуд. Ин нашрия қаблан хабар дода буд, ки интернет бо фармони сарвари олии Толибон(ҳаракати мамнуъ дар Тоҷикистон) Хайбатулло Охундзода қатъ карда шудааст. Ширкатҳои телекоммуникатсионии Афғонистон ҳам тасдиқ карда буданд, ки қатъи саросарӣ бо фармони бевоситаи роҳбарияти олии кишвар амалӣ карда шудааст.
Дар ҳоле ки интернет ва алоқаи телефонӣ дар саросари Афғонистон комилан қатъ шуд, фаъолияти муассисаҳои давлатӣ ва хусусӣ вайрон шуд ва аҳолии кишвар аз дастрасӣ ба хидматҳои асосӣ ва имконияти тамос бо ҷаҳони беруна маҳрум гардиданд. Аз ҷумла, афғонҳое, ки дар хориҷа буданд, наметавонистанд ба ватан пул интиқол диҳанд, онҳое, ки барои табобат ба хориҷа рафтанд, маҷбур шуданд, ки бистарӣ шудан ва ҷарроҳиро бекор кунанд, зеро пардохти хизматрасониҳои тиббӣ тавассути бонкҳои Афғонистон ғайриимкон буд. Аксари шабакаҳои телевизионӣ пахши худро қатъ карданд ва дар фурудгоҳи Кобул 30 сентябр ҳамаи парвозҳо бекор карда гардида буданд.