Бохтар: Тамошои Рӯзи дониш ва дарси сулҳ аз ҷониби аҳли маориф

Имрӯз бо иштироки Роҳбари давлат Рӯзи дониш ва дарси сулҳ баргузор гашт, ки аҳли маорифи шаҳри Бохтар онро сарҷамъона тамошо карда, дастуру супоришҳои додаи Пешвои миллатро сармашқи кори худ мекунанд.
30 август Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ бо мақсади иштирок дар Рӯзи дониш ва дарси сулҳ ба Донишгоҳи байналмилалии сайёҳӣ ва соҳибкории Тоҷикистон ташриф оварданд.
Пешвои миллат муҳтарам Эмомалӣ Раҳмон пас аз ифтитоҳи бинову иншооти нав дар ҷамъомад ба муносибати рӯзи дониш бо аҳли маорифи кишвар мулоқот ва суханронӣ намуданд.
Сарвари давлат муҳтарам Эмомалӣ Раҳмон вохӯрии имрӯзаро фурсати хубе барои таҳлилу баррасии вазъи соҳаи ҳаётан муҳим – маориф арзёбӣ намуданд.
Суханронии Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро ба муносибати Рӯзи дониш ва дарси сулҳ, дар тамоми муассисаҳои таълимии шаҳри Бохтар омӯзгорону хонандагон мустақиман тавассути маниторҳо бо ҷонибдории том тамошо карда, онро ҳамчун роҳнамо барои фаъолияти пурсамари минбаъда маънидод карданд.
Раҳмоналӣ Додархӯҷаев,
Бохтар