“Ҷанг”-и Трамп бо Би-би-сӣ идома дорад

Доналд Трамп, Президенти Амрико эълон кардааст, ки барои ҳифзи обрӯи худ ва талаби товон то панҷ миллиард доллар аз Би-би-сӣ, иқдоми қонунӣ мекунад.
Вай шаби гузашта ба хабарнигорон гуфтааст, “мо аз онҳо байни як то панҷ миллиард доллар товон талаб хоҳем кард. Эҳтимолан ҳафтаи оянда. Мо маҷбурем ин корро анҷом диҳем”.
Ин изҳорот пас аз он матраҳ шуд, ки Би-би-сӣ аз раисҷумҳури Амрико Трамп бахшиш пурсид, аммо дархости ӯ барои пардохти товони як миллиард долларро напазируфт.
Би-би-сӣ муттаҳам аст, ки суханронии 6-уми январи соли 2021-и Трампро ба тавре нашр кардааст, ки нишон диҳад ӯ мардумро мустақиман ба қонуншиканӣ даъват кардааст.
Би-би-сӣ дар ин маврид иштибоҳи худро пазируфта ва ба ҳамин далел, мудири умумии ин расонаи давлатии Бритониё ва мудири бахши хабари он истеъфо доданд.
Пеш аз ин вакилони дифои Трамп то рӯзи ҷумъа ба Би-би-сӣ фурсат дода буданд, ки расман узрхоҳӣ кунад ва товон пардозад.
Бо ин ҳол, Би-би-сӣ танҳо узрхоҳии расмӣ карда, дархости Трамп барои пардохти товони якмиллиарддоллариро қабул накардааст.